Fatmir Muja

[Ajogoca1]

Hesht, nëse s’mund të flasësh me dashuri
Se goja veshin ka myshteri
E kur goja pa zemër flet
Jo veshin, por zemrën e vret
Gjërat për të cilat sot qorton tjetrin
Nesër mund t’i bësh edhe vetë.

 

[Ajogoca1]

Malli më mori për netët
kur hëna ndahej e ne bashkoheshim,
Gjithë bota ruhej brenda nesh,
edhe pse nga bota largoheshim,
Qaj për netët e përndritshme
kur koha nuk matej me orë,
Krojet dhe detet e gjithë Tokës
nuk shprehin dhembje sa një lot njerëzor,
Emri i Të Dashurit çdo lutje e bën të bukur,
Dashurinë do ta gjesh kur veten ta kesh humbur.

 

[Ajogoca1]

 

[Ajogoca1]

Kthehu në Qendrën tënde
Ku ishe i pandarë
Mijëra degë të pemës
Kanë ardhur nga një Farë
Toka dhe Shtatë Qiejt
Mall për ty po ndiejnë
Veç zemrat e vdekura
S’kanë çfarë të rrëfejnë
Mund t’i numërosh plagët
Por dhembjet s’numërohen
Rrënjët edhe degët
Veç në Farë takohen
Sado të degëzohesh
Fara mbetet Një
Takohu me veten
Mos e braktis më!

 

[Ajogoca1]

Ç’bën urrejtja?
Urryesin e sëmur, të urryerin s’e ndryshon
Trupin s’e ngop, shpirtin e dënon
Në zemër ndez ferrin dhe parajsën djeg
Rrugës së hapur s’ia lë asnjë shteg
Derën pa dry e lë të pahapur
Asgjë s’dhemb më shumë se plaga e papërgjakur
Në trup nuk shihet, në gjithë qenien ndihet
Lëngohet nga sëmundja që ilaçi i dihet
Secili urryes tjetrin urren
Aq sa urrejtje në vetvete ndien
Secili dashuronjës ofron dashuri
Aq sa e ndien ashkun në qenien e tij
E ç’është urrejtja, meqë shërohet me ashk?
Është dashuri, por e kthyer mbrapsht.

 

[Ajogoca1]

Ndonjëherë pyetjet janë dhimbje e përgjigjet ilaç për t’u shëruar
Ndonjëherë prania jote nuk çmohet deri sa ti të kesh munguar,
Pergjigjet më të mëdha në jetë janë ato që mund t’i kthesh pa fjalë
Ca zemra do ta ndiejnë mungesën tënde, atëherë kur shohin se edhe pa to ia ke dalë
Fara jeton në errësirë që në dritë të jetojnë petalet
Për ta shfaqur bukurinë, çdoherë nuk duhen fjalët
Heshtja është gjuha e të dashuruarve që pa fjalë kuptohen më lehtë
Dashuronjësi nuk e poshtëron kurrë të dashurin e vet
Aty ku frika është e pranishme, dashuria nuk bëhet e qenësishme
Nga zemra jote në zemrën time, vjen një pyetje e rëndësishme:
“Meqë aty ku frika ekziston, dashuritë nuk gjallërohen,
Atëherë, përse të dashuruarit nga njëri-tjetri frikësohen?”
Se ç’fshehtësi ndodhet në farë, e ka zbuluar petalja
Të dashuruarit s’frikësohen nga njëri-tjetri, ata frikësohen veç nga ndarja.

 

[Kresha]

"Të gjitha ndarjet janë ikje, por jo të gjitha ikjet janë ndarje." ~