Ndërron jetë në moshën 81 vjeçare Artisti i Madh Sherif Merdani

[Lina]

Ndërron jetë në moshën 81 vjeçare Artisti i Madh Sherif Merdani​

Arti shqiptar në zi! Artisti i njohur Sherif Merdani është ndarë nga jeta në moshën 81-vjeçare.

Merdani njihet si një nga këngëtarët më të mëdhenj të muzikës së lehtë shqiptare, teksa ka punuar edhe si diplomat në ambasadën shqiptare në Romë.
Ai ka qenë edhe i dënuar në kohën e diktaturës, pasi bëri 16 vite burg pas Festivalit të 11-të, së bashku me disa kolegë të tij.

Disa nga këngët e tij:
Kartolina
A do vish sivjet në plazh
Duart e tua (kënduar në festivalin e 11)
Se kënduam “Let it be”
Simfonia e nënës
Shokë të pandarë
Takim pas vitesh
Sot ora shtatë

Top Channel

 

[Lina]

Veliaj: Me ikjen e Sherif Merdanit, kënga shqiptare humbi një nga zërat e saj më të mirë​

Kryetari i Bashkisë së Tiranës, Erion Veliaj, përmes një mesazhi ka shprehur ngushëllimet për ndarjen nga jeta të këngëtarit të njohur Sherif Merdani.

Veliaj e ka quajtur humbjen e artistit që vuajti gjatë edhe nga regjimi diktatorial, një humbje për artin dhe muzikën shqiptare.
“Me ikjen e Sherif Merdanit, kënga shqiptare humbi një nga zërat e saj më të mirë. Ai ishte një simbol i rezistencës kundër regjimit diktatorial dhe një shpirt i lirë. U prehsh në paqe! Ngushëllime familjes,” shprehet në mesazhin e tij kryebashkiaku Veliaj.


Këngëtari i njohur Sherif Merdani ka ndërruar jetë ditën e sotme në moshën 81-vjeçare.



Top Channel

 

[Lina]

Kryetari i Kuvendit mesazh ngushëllimi për ndarjen nga jeta të këngëtarit të njohur Sherif Merdani​

Kryetari i Kuvendit, Gramoz Ruçi, ka shprehur sot ngushëllimet për ndarjen nga jeta të këngëtarit të njohur Sherif Merdani.

“Sherif Merdani ishte një këngëtar dhe artist i madh, që i këndoi me dashuri jetës, dashurisë, nënës dhe gjithçkaje të bukur te njerëzit, shpirti dhe ndjenjat e tyre. Repertori i Sherif Merdanit është një simfoni e dashurisë dhe bukurisë njerëzore. Me artin e tij Sherif Merdani emancipoi artin, këngën dhe muzikën shqiptare. Për këtë kontribut emancipues, ky artist i madh vuajti dënime e sakrifikoi vite të tëra nga jeta e tij. Por këto vuajtje nuk ia ndrydhën talentin dhe nuk ia pakësuan fisnikërinë. Me këngët e Sherif Merdanit jemi rritur dhe ato do të vazhdojnë të frymëzojnë brezat e ardhshëm.”, shkruan në mesazhin e tij Kryetari i Kuvendit, Gramoz Ruçi.


Top Channel

 

[Lina]

Ndarja nga jeta e artistit Sherif Merdani – Rama, Basha dhe Meta mesazh ngushëllimi​

Kryeministri Rama, kryedemokrati Basha dhe Presidenti Meta kanë shprehur ngushëllimet e tyre të sinqerta për ndarjen nga jeta të artistit të madh, Sherif Merdani.


Kryeministri Rama bashkangjitur fotos së artisti shkruan: “LAMTUMIRË SHERIF MERDANI”.
Ndërkaq, kryedemokrati Basha përmes një postimi në rrjete sociale ka shprehur ngushëllimet për miqtë dhe të afërmit e artisti Merdani.


“Me trishtim mësova lajmin e ndarjes nga jeta të artistit të njohur Sherif Merdani. Sherifi ishte një nga artistët më të spikatur të brezit të tij. Zëri dhe arti i tij kumboi fort dhe në errësirën e regjimit dhe të burgjeve të komunizmit në të cilat ai kaloi 16 vite të jetës. I shpreh ngushëllimet më të thella familjes, të afërmve, miqve dhe të gjithë komunitetit të artistëve shqiptarë që sot humbën të afërmin dhe mikun e tyre! Shpirti i tij u prehtë ne paqe!”, shkruan Basha.

Presidenti Meta në mesazhin e tij të ngushëllimit shkruan:
“Këngëtari i lirisë, Sherif Merdani u nda sot prej nesh duke lënë pas shumë dhembje.
I burgosur politik, së bashku me të tjerë artistë të mëdhenj pas Festivalit të 11-të të muzikës së lehtë shqiptare, ai kaloi një kalvar të gjatë vuajtjesh pse guxoi të jepte një dritë shprese, nëpërmjet artit, në periudhën më të errët për vendin.
Ngushëllime familjes dhe komunitetit të artistëve për këtë humbje të pazëvendësueshme!
I paharruar kujtimi i Sherif Merdanit!
“…Dhe me diellin çdo mëngjes, po, po,
‘Let it be’, kam për të kënduar”.”.


Top Channel