Është një recetë e thjeshtë, me pak përbërës. Po ju sjell dy variantet sipas meje, korçarët mbase i bëjnë edhe ndryshe por mua më pëlqen të provoj dhe disa gjera i ndryshoj Gjëja e parë që do bëjmë janë palaçinkat.
Ato origjinalet bëhen me ujë, jo me qumësht, si palaçinkat e zakonshme. Unë i bëra me qumësht, por pa vezë.
Përbësit:
Miell 800 gr
Kripë
3 lugë vaj
Qumështin e shtojmë me sy, aq sa të bëhet një masë jo shumë e trashë, as e lëngshme fare sepse nuk lidhet.
Për mbushjen kam përdorur dy variante, njëra me gjizë të njomë, e perzier me kajmak e tjetra me djathë të thërrmuar.
Për shëlliren ku do ''lahen'' petët:
Shëllirë djathi rreth 1 filxhan
Mendërz të thatë
Hudhra 4-5 thelba
Ujë rreth 2 filxhanë
Gjalpë 3-4 lugë
Arra një dorë
Bëjmë palaçinkat. Zëmë brumin me të gjithë përbërësit dhe i pjekim në tigan, një nga një. Në fillim përgatisim shëllirën e aromatizuar: Pastaj në një tigan veme gjalpin të nxehet pak, shtojmë aty hudhrat e grira, i skuqim lehtë derisa të marrin ngjyrë të artë jo të digjen i hedhim ujin,shëllirën dhe menderzën (nenexhikun) e lëmë të ziejë ca. Marrim një tavë me diametrin e petëve, e lyejmë me gjalpë. Bëjmë gati mbushjen,me djathë të thërrmuar ose gjizën e përzier me kajmak e pak kripë.
Marrim petët, i lagim një nga një, shtrojmë në tavë petën e lagur, djathin, përsëri pak mendërz dhe e spërkasim me arra e kështu me radhë deri sa të mbarojë, e presim në copa dhe i pjekim ne furrë për t’I pjekur për rreth 15-20 minuta në 200 gradë.