Studentët amerikanë akuzohen për vrasje të policit në Romë, prokurori kërkon burgim të përjetshëm
ROMË
Një prokuror italian kërkoi të shtunën dënime të përjetshme për dy të rinj amerikanë që po gjykohen me akuza për vrasje, pasi një polic u vra pas një rasti për shitje të drogës në Romë.
Finnegan Lee Elder, i cili ishte 19 vjeç në atë kohë, e ka pranuar që e goditi me thikë Mario Cerciello Rega, ndërsa shoku i tij Gabriel Christian Natale-Hjorth, atëherë 18 vjeç, po zihej me një oficer tjetër policie.
Elder dhe Natale-Hjorth ishin në Romë me pushime në atë kohë dhe ishin përpjekur të blinin drogë nga një tregtar lokal. Ata i kanë thënë gjykatës se ishin mashtruar, por arritën të rrëmbenin një qese nga një ndërmjetës, ndërsa u përpoqën të largohen.
Më pas, ata ranë dakord të takonin tregtarin përsëri për t’i marrë paratë e tyre në këmbim të çantës, por në vend të kësaj u paraqitën dy policët. Asnjë prej tyre nuk ishte me uniformë dhe Elder ka dëshmuar se ata menjëherë i sulmuan ata, duke e detyruar atë dhe Natale-Hjorth të mbroheshin.
“Unë u kapa nga paniku dhe besova se ai donte të më vriste,” citoi media italiane Elder t’i thoshte Gjykatës më parë këtë muaj. Policia thotë se Cerciello, 35 vjeç, ishte i paarmatosur në atë kohë dhe u godit me thikë 11 herë nga Elderme një teh 18 cm (7 inç).
Mediat italiane kanë raportuar se tregtari ishte një informator i cili kishte raportuar vjedhjen e çantës, duke kërkuar që policia të ndërhynte. Në një paraqitje në gjyq shtatorin e kaluar, Elder kërkoi falje për vrasjen. Natale-Hjorth fillimisht i tha policisë se ai nuk ishte përfshirë në vrasje dhe nuk e dinte që shoku i tij kishte një thikë. Sidoqoftë, shenjat e gishtërinjve të tij u gjetën në një panel në tavanin e dhomës së tyre të hotelit ku ishte fshehur thika.
Avokatët e Elder dhe Natale-Hjorth ende nuk kanë paraqitur mbrojtjen e tyre. Një vendim në gjyq pritet në prill, thanë burimet ligjore.
( Balkanweb)
