Viti i ri akademik, Manastirliu: Kemi nisur vaksinimin për pedagogë e studentë në çdo universitet
Ministrja e Shëndetësisë, Ogerta Manastirliu shkruan se tashmë në çdo universitet të Shqipërisë ka nisur vaksinimi antiCovid për studentë e pedagogë.
Në prag të nisjes së universitetit, Manastirliu thotë se ky proces po bëhet për të patur një garanci më shumë për vitin e ri akademik.
“Dyert e universiteteve janë hapur më herët, për të vaksinuar pedagogë e studentë, si një garanci më shumë, për një ecuri sa më të mirë të vitit të ri akademik që është në prag. Me programin tonë të vaksinimit në komunitet, kemi nisur vaksinimin anticovid me ekipet tona mjekësore në çdo universitet të vendit”, thuhet në postimin e Manastirliut.
11 tetori shënon edhe fillimin e vitit të ri akademik, ndërkohë që edhe ministrja e Arsimit, u bëri thirrje studentëve dhe pedagogëve që këtë muaj ta shfrytëzojnë për vaksinimin anti-COVID.
Ndërkaq, Kryeministri Rama pak javë më parë e bëri të qartë se studentët duhet të vaksinohen në rast se duan të hyjnë në auditore!
Top Channel
